Maara Gũte Nyina

Ugai ĩĩtha ndĩmũganĩre. Ĩĩtha! Ĩĩtha! Ĩĩtha!

Tene na ti tene mũno nĩ kwarĩ mwaanake wetagwo Maara ũrĩa waciarĩtwo e wa mũmwe. Aciari aake maarĩ athĩni na maarutaga wĩra wa kũhĩta na kũguĩma rĩgu wa mũtitũ. Nyina wa Maara ndarĩ wĩra aarutaga tondũ aatũũraga arĩ mũhinyĩrĩrĩku mwĩrĩ nĩũndũ wa mũrimũ na ũkũrũ. Mũthenya ũmwe, ithe wa Maara nĩaakuire na makĩmũte kĩbĩrĩra-inĩ kũringana na mũtugo wa mahinda macio. Nacio hiti igĩũka ikĩmũrĩa. Rĩu Maara magĩtigwo na nyina. Nĩ aathiaga kũhĩta arĩ wiki akarehera nyina gĩa kũrĩa. No mahinda mangĩ na mangĩ, nĩ aagaga kũgwatia onakĩ gĩakũinũkĩria nyina. Nĩonire hatirĩ ũndũ ũngĩ ta atĩ nyina nĩegũkua o ihinda rĩtarĩ haraaya nĩũndũ wa ng’aragu na ũkũrũ. Nĩaaiguaga ũũru mũno oona andũ makĩhĩtũkĩria mahiũ hakuhĩ na kwao mũciĩ magĩthiĩ rũũru kana makiuma kũrĩithia makenete na mena hinya mĩĩrĩ yao. Nĩathĩnĩkire ngoro tondũ wakũmenya atĩ aanake acio me na gĩagũkagaya kuuma kũrĩ maithe mao no we rĩ, akagaya kĩ kuuma kũrĩ ithe tiga ime rĩa rũci-inĩ na ũhĩti ũtarĩ umithio.

Kĩrooko kĩmwe, nĩokĩrire na agĩkora nyina e mũrũaru mũno arĩ hakuhĩ gũkua. Akĩnyitwo nĩ kĩeha kĩnene no gũtirĩ mũũndũ eerire ũhoro wĩgiĩ ndwari ĩyo. Amũhiũhagĩria arĩ o wiki na tũnyama tũhũthũ twa nyamũ iria aahĩtaga. Nyina ndaacenjagia mwĩrĩ ĩndĩ aathiaga ona mbere kũhinyĩrĩrĩka. Nĩatooririo nĩ mũrimũ na agĩkua no Maara ndeerire andũ ũhoro wa gĩkuũ kĩu tondũ ndeendaga mataaro ma mũũndũ ma ũrĩa agĩrĩirwo nĩ gũthika kana gũte nyina.

Gwatuka, nĩeciririe mũno nginya akĩremwo nĩ gũkoma oona kĩimba kĩa nyina. Kĩrooko gĩkĩ kĩngĩ hĩndĩ ĩrĩa nyoni icuracuraga na gũtarĩ mũũndũ ũkĩrĩte, akĩoya mwĩrĩ wa nyina na akĩũtwara harĩa ng’ombe ciageragĩra igĩthiĩ gũcũna mũnyũ nake agĩikara handũ haraaya karũgongo-inĩ eroreire ng’ombe igĩũka one ũrĩa gũgũthiĩ na mbere.

Ng’ombe igĩũka iteng’eranĩtie, igĩkinyanga mwĩrĩ wa nyina wa Maara ikĩũthũkangia ũũru. Maara agĩũka ateng’erete na kũrĩ arĩithi akiugaga mbu. Aakinya harĩa maarĩ, akĩmeera ng’ombe ciao nĩcioraga nyina. “Mũticirũgamie, uu! uu! Nĩmworaga maitũ.” Arĩithi makĩhanyũka harĩa Maara aakometie nyina na magĩkora ti itherũ nĩ ũhoro wa ma. Maara akĩrĩrithia maithori ma mbakĩ  akĩmeeraga atĩ nĩmatũma atigwo arĩ mwana wa ngoriai. Akiuga no nginya arĩhwo gĩkuũ kĩu na ng’ombe icio ciamũũraga na maarega kũmũrĩha, nĩagũthiĩ kwa mũũndũ Mũgo akamũrĩhĩrie. Magĩtĩkĩra kũmũrĩha na makiuga matikũmenyaga atĩ nyina wa Maara nĩgũikũrũka agũikũrũkaga tondũ nĩmangĩrigĩrĩirie ng’ombe itikamũkinyange. Ũhoro ũcio ũgĩtuĩka ũtwarĩrwo athuuri a itũũra maũtuithanie macooke maathane mũigana wa ng’ombe iria  Maara akũrĩhwo.

Athuuri magĩtua atĩ Maara arĩhwo ng’ombe mĩrongo ĩtatũ na itindĩkwo na ng’ombe ĩngĩ ĩmwe. Agĩtuĩka gĩtonga kĩnene, akĩhikia atumia aingĩ mũno na mũciĩ wake ũkĩneneha mũno thĩiniĩ wa itũũra rĩu. Thuutha wa thikũ nyingĩ gũthira, andũ nĩmaamenyire wara ũrĩa wahũthĩrirwo nĩ Maara nĩguo arĩhwo nyina. Makĩmenya atĩ nyina wa Maara aakuĩrĩire nyũmba no ti ng’ombe ciamũũragire. Agĩtũũra arĩ gĩtonga kĩnene kĩa itũũra. Rũgano rwakwa rwathirĩra hau na ndigathiranie naruo.