Stefano Wanyee wa Kĩnũthia aciarirwo mwaka-inĩ wa 1895 itũũra-inĩ rĩa Kanjũũ (harĩa Kabete Campus ĩrĩ) arĩ mwana wa gatatũ wa Kĩnũthia wa Kamũyũ. Agĩire na ngumo nĩ itemi rĩake harĩ waki wa Gĩthũngũri Teachers College mwaka-inĩ wa 1929. Nĩwe warutire indo nyingĩ biũ nĩguo Kenyatta athiĩ rũraaya rwa Wangũ atũmĩtwo nĩ athuuri a kĩama.
Aarĩ Mũceera na nĩendete maciira mũno ona nĩangĩagũtwarire igooti-inĩ nĩ kũmwĩka maũndũ mega.
Nĩwe warĩ wa mbere gwaka nyũmba cia gũkombora Karandi-inĩ na agĩaka nyũmba ya agendi ĩratũire ĩtagwo kĩbeeri kĩa Wanyee.
Nĩarĩ na ũũgĩ mũnene wa mũtũrĩre ona waara wa kũngania na kũhothithia mbeca. Kũrĩ mwaka-inĩ wa 1951 nĩ eetire mũndũ mũgo warĩ Mwĩthaga wetagwo Karigithe woimaga Kambaa ya Wakahoi oke aroge mũndũ wothe wagerete kana akaiya kĩndũ mũgũnda-inĩ wake. Andũ arĩa othe maagerete kuo makĩĩrwo marute o mũndũ ciringi ĩmwe matikarĩo nĩ ũrogi ũcio wa Mwĩthaga. Nĩ ũndũ wa ngumo nene ya Karigithe andũ makĩruta mbeca nyingĩ mũno. Wanyee ndarĩire ciringi ona ĩmwe na ciothe agĩcitwara Gĩthũngũri kĩa Wairera igaake thukuru wa gũthomithia ũrutani.
Aakuire mbaara ĩtanaitĩka kũrũo mwaka-inĩ wa 1952 na agĩthikwo gwake Dagoretti barabara ĩrĩa nayo ĩtanĩtio na gĩtang’a gĩetagwo Ndwaru. Aathikirwo nĩ mũbicobu wetagwo Gathuna o ũrĩa wathikire Kĩnyatta nake agĩkua mũthenya oro ũcio.
